ராய்ப்பூர், ஏப்.22 (டிஎன்எஸ்)  சட்டீஸ்கர் மாநிலத்தில் மாவட்ட கலெக்டர் ஒருவரை நக்சலைட்டுகள் கடத்தியுள்ளனர். இச்சம்பவத்தில் கலெக்டரின் பாதுகாப்பு வீரர்கள் இருவர் கொல்லப்பட்டனர்.  கடத்தப்பட்ட கலெக்டர் நெல்லை மாவட்டம் பாளையங்கோட்டையைச் சேர்ந்தவர்.

சட்டீஸ்கர் மாநிலம் சுக்மா மாவட்ட கலெக்டர் அலெக்ஸ் பால் மேனன். அப்பகுதியில் நடந்த கிராம் சூரஜ் பிரசார நிகழ்ச்சியில் கலந்து கொண்டு விட்டு திரும்பும் வழியில் அவர் கடத்தப்பட்டுள்ளார்.  சம்பவ இடத்திற்கு மாவட்ட எஸ்.பி., அபிஷேக் சாண்டில்யா விரைந்துள்ளார்.

"கிராம சுராஜ்' என்கிற புதிய திட்டத்தின் கீழ் கிராம மக்களின் குறைகளைக் கேட்டு உடனுக்குடன் நடவடிக்கை எடுக்கும் பொது நிகழ்ச்சியின்போது, மாஜிபாரா என்ற அந்த கிராமத்துக்கு பைக்குகளில் வந்த 20-க்கும் மேற்பட்ட நக்சல்கள் அவருடைய 2 பாதுகாவலர்களையும் சுட்டுக்கொன்றுவிட்டு அவரைக் கடத்திச் சென்றனர்.

மாவட்ட அரசு அதிகாரிகள் முன்னிலையிலேயே துணிகரமாக இச் சம்பவம் நடந்துள்ளதால் மாநிலத் தலைநகர் ராய்ப்பூருக்கும் தில்லிக்கும் உடனே தகவல் தரப்பட்டது.

2006-ல் ஐ.ஏ.எஸ். அதிகாரியாகத் தேர்வு பெற்ற மேனன் மிகவும் துடிப்பானவர். சுக்மா என்கிற புதிய மாவட்டத்தின் வளர்ச்சிக்காக அயராது பாடுபட்டு வருகிறார். தங்களுடைய செல்வாக்கு சரிந்துவிடுமோ என்று அஞ்சியும் அதிகாரிகள் யாரும் கிராம மக்களை நெருங்கக்கூடாது என்று எச்சரிக்கவும் இந்தக் கடத்தல் நடந்திருப்பதைப் போலத் தோன்றுகிறது.

மாவட்ட காவல்துறை கண்காணிப்பாளர் அபிஷேக் சாண்டில்யா தலைமையில் போலீஸ் படை அந்தப் பகுதியில் தேடுதல் வேட்டையை உடனே தொடங்கியது.

அவரைக் கடத்திச் சென்றவர்கள் அதன் பிறகு அரசுடனோ பத்திரிகைகளுடனோ தொடர்பு கொள்ளவில்லை. தங்களுடைய கோரிக்கைகள் என்ன, எதற்காக ஆட்சியரைக் கடத்தினார்கள் என்று தெரிவிக்கவில்லை.

கிராம மக்கள் நக்சல் இயக்கத்தில் சேருவதையும் நக்சல்களுக்கு ஆதரவு தருவதையும் தடுப்பதற்குத்தான் இந்த கிராம சுராஜ் திட்டம் கொண்டுவரப்பட்டுள்ளது. இது மக்களிடையே பிரபலம் ஆவதால் கோபம் அடைந்து நக்சல்கள் இந்த நடவடிக்கையை எடுத்திருக்கக் கூடும் என்று தெரிகிறது.

முதல்வர் உறுதி:

மாவட்ட ஆட்சியர் அலெக்ஸ் பால் மேனனை உயிருடன் மீட்க அனைத்து வகைகளிலும் நடவடிக்கை எடுக்கப்படும் என்று மாநில முதலமைச்சர் ரமண் சிங் உறுதி அளித்தார். அவர் மாநிலத் தலைமைச் செயலாளர், காவல்துறைத் தலைவர் ஆகியோருடன் உடனடியாக இது குறித்து விவாதித்தார்.

ப சிதம்பரம் உறுதி:

ஆட்சியரை மீட்க மாநில அரசுக்குத் தேவைப்படும் எல்லாவிதமான உதவிகளையும் மத்திய அரசு அளிக்கும் என்று உள்துறை அமைச்சர் ப. சிதம்பரம் உறுதி அளித்தார்.

மனைவி கோரிக்கை:

மனிதாபிமான அடிப்படையில் தனது கணவரை விடுவிக்குமாறு நக்சலைட்டுகளுக்கு ஆட்சியரின் மனைவி ஆஷா மேனன் வேண்டுகோள் விடுத்துள்ளார். கணவரை விடுவிப்பதில் அரசு தேவையான நடவடிக்கைகளை எடுக்கும் என்றும் அவர் நம்பிக்கை வெளியிட்டுள்ளார்.

எனது கணவரின் உடல் நிலை சரியில்லை. மருந்துகளை அவர் எடுத்துச் செல்லவில்லை. எனவே மனிதாபிமான அடிப்படையில் அவரை உடனடியாக விடுவிக்க வேண்டும் என்று அவர் கோரிக்கை விடுத்துள்ளார்.

தனது கணவர் நேர்மையான அதிகாரி என்றும், சுக்மா மாவட்ட வளர்ச்சிக்குத் தேவையான நடவடிக்கைகளை எடுத்து வந்ததாகவும் அவர் குறிப்பிட்டார். தனது கணவருடன் மாலை 4.45 மணிக்குப் பேசியதாகவும், அதற்குப் பிறகு அவருடன் பேச முடியவில்லை என்றும் செய்தியாளர்களிடம் அவர் தெரிவித்தார்.

மிகவும் பின்தங்கியப் பகுதியான சுக்மா மாவட்டம் உருவாக்கப்பட்ட பிறகு இங்கு நியமிக்கப்பட்ட முதலாவது ஆட்சியர் இவர் என்பது குறிப்பிடத்தக்கது. நக்சலைட்டுகள் பாதிப்பு அதிகம் உள்ள இப்பகுதியில் பல்வேறு வளர்ச்சிப் பணிகளை இவர் மேற்கொண்டு வந்தார்.

இவரை விடுவிப்பது தொடர்பாக நக்சலைட்டுகளிடமிருந்து தங்களுக்கு எவ்வித தகவலும் வரவில்லை என்று போலீஸார் தெரிவித்துள்ளனர்.  (டிஎன்எஸ்)